अखेर पै.चंद्रहार पाटील यांना जामीन मंजूर
साथीदार सागर सुरवसे याचा जामीन नामंजूर
विटा -
वाळूच्या दंडप्रकरणातून तहसीलदारांना मारहाण केल्याप्रकरणी 14 दिवस न्यायालयीन कोठडीत असणाऱ्या डबल महाराष्ट्र केसरी पै.चंद्रहार पाटील यांना जिल्हा सत्र न्यायालयाने जामीन मंजूर केला आहे. परंतु त्याचा साथीदार सागर सुरवसे याचा जामीन जिल्हा सत्र न्यायालयाने नामंजूर केला आहे.
विट्याचे तहसीलदार ऋषिकेत शेळके आणि तालुका वैद्यकीय अधिकारी डॉ. अनिल लोखंडे यांना मारहाण केल्याप्रकरणी पै.चंद्रहार पाटील याच्यावर 3 मे रोजी विटा पोलिसांत गुन्हा दाखल झाला होता. या घटनेनंतर चंद्रहार पाटील तब्बल 15 दिवस फरारी होता. त्याच्या अटकेसाठी पोलिसांवर दबाव वाढला होता. पै. चंद्रहार सुभाष पाटील आणि त्याचा साथीदार सागर श्रीमंत सुरवसे (वय 19, रा. कंडारी, जि.उस्मानाबाद) या दोघांना सांगली स्थानिक गुन्हे अन्वेशन शाखेच्या पोलिसांनी 17 मे रोजी दिघंची पंढरपूर रस्त्यावर सापळा रचून अटक केली होती. या दोघांची 14 दिवसांच्या न्यायालयीन कोठडीत रवानगी करण्यात आली होती. त्यामुळे पै. चंद्रहार पाटील यांच्या सुटकेसाठी सांगली जिल्हा सत्र न्यायालयात जामीन अर्ज ठेवला होता. त्यावर न्यायालयाने दोन्हीकडील युक्तिवाद ऐकून पै.चंद्रहार पाटील यांचा जामीन मंजूर करत मुक्तता करण्याचा आदेश दिला आहे. परंतु त्याचा साथीदार सागर सुरवसे याचा जामीन जिल्हा सत्र न्यायालयाने नामंजूर केला आहे.
जिल्हा सत्र न्यायालयात पै.चंद्रहार पाटील यांच्या वतीने अँड. महेश शानभाग, अँड. श्रीकांत जाधव यांनी कामकाज पाहिले.
